കോഡൂർ: തദ്ദേശ സ്വയംഭരണ തിരഞ്ഞെടുപ്പിൽ ഉജ്ജ്വല വിജയം നേടിയ ജനപ്രതിനിധികൾക്ക് അറക്കൽപ്പടി വാർഡ് വനിതാ ലീഗ് കമ്മിറ്റിയുടെ നേതൃത്വത്തിൽ ഉജ്ജ്വല സ്വീകരണം നൽകി. അറക്കൽപ്പടി വാർഡ് മെമ്പർ ഷൗക്കത്തലി ഇ.കെ, വലിയാട് വാർഡ് മെമ്പർ കെ.എം സുബൈർ സാഹിബ് എന്നിവരെയാണ് ചടങ്ങിൽ ആദരിച്ചത്.
തിരഞ്ഞെടുപ്പ് പ്രചരണ രംഗത്ത് വലിയാട്, അറക്കൽപ്പടി, ആൽപറ്റകുളമ്പ വാർഡുകളിൽ വനിതാ ലീഗ് കമ്മിറ്റി നടത്തിയ സജീവമായ ഇടപെടലുകൾ ഏറെ ശ്രദ്ധിക്കപ്പെട്ടിരുന്നു. താഴേത്തട്ടിലുള്ള വീടുകൾ കേന്ദ്രീകരിച്ച് വനിതാ പ്രവർത്തകർ നടത്തിയ ചിട്ടയായ പ്രവർത്തനമാണ് വാർഡുകളിലെ വിജയത്തിൽ നിർണ്ണായകമായതെന്ന് ചടങ്ങിൽ നേതാക്കൾ അഭിപ്രായപ്പെട്ടു.
വിവിധ മേഖലകളിൽ നിന്നുള്ള പ്രാദേശിക നേതാക്കളും പ്രവർത്തകരും ചടങ്ങിൽ സംബന്ധിച്ചു. വിജയികളായ ജനപ്രതിനിധികൾക്ക് ഉപഹാരങ്ങൾ സമർപ്പിച്ചു. വരും വർഷങ്ങളിൽ വാർഡിന്റെ സമഗ്ര വികസനത്തിന് മുൻഗണന നൽകുമെന്ന് മെമ്പർമാർ മറുപടി പ്രസംഗത്തിൽ അറിയിച്ചു.