റാഞ്ചി: ജാർഖണ്ഡിലെ റാഞ്ചി വിമാനത്താവളത്തിൽ നിന്ന് പറന്നുയർന്ന പിന്നാലെ എയർ ആംബുലൻസ് തകർന്നുവീണു. വിമാനത്തിലുണ്ടായിരുന്ന ഏഴ് പേരും മരിച്ചു. രണ്ട് പൈലറ്റുമാരും മെഡിക്കൽ സംഘവും ഒരു രോഗിയുമാണ് വിമാനത്തിലുണ്ടായിരുന്നത്.
തിങ്കളാഴ്ച രാത്രിയോടെയായിരുന്നു അപകടം. റാഞ്ചിയിൽ നിന്ന് ഡൽഹിയിലേക്ക് പുറപ്പെട്ട വിമാനം പറന്നുയർന്ന് മിനിറ്റുകൾക്കകം റഡാറിൽ നിന്ന് അപ്രത്യക്ഷമാവുകയായിരുന്നു. ഝാർഖണ്ഡിലെ ഛത്ര ജില്ലയിലെ സിമരിയയിൽ വനമേഖലയിലാണ് വിമാനം തകർന്നുവീണത്.
മോശം കാലാവസ്ഥയാണ് അപകടത്തിന് കാരണമായതെന്നാണ് പ്രാഥമിക നിഗമനം. റെഡ്ബേർഡ് എയർവേയ്സിന്റെ സി-90 ചാർട്ടേഡ് വിമാനമാണ് അപകടത്തിൽപ്പെട്ടത്. വിമാനം തകർന്നുവീണതിന് പിന്നാലെ വൻ സ്ഫോടനമുണ്ടായതായി പ്രദേശവാസികൾ പറഞ്ഞു. ഡിജിസിഎ അപകടത്തിൽ അന്വേഷണത്തിന് ഉത്തരവിട്ടിട്ടുണ്ട്.