ബെംഗളൂരു/അമരാവതി: കുട്ടികളുടെ സോഷ്യൽ മീഡിയ ഉപയോഗത്തിന് കർശന നിയന്ത്രണങ്ങളേർപ്പെടുത്താൻ അയൽസംസ്ഥാനങ്ങളായ കർണാടകയും ആന്ധ്രാപ്രദേശും ഒരുങ്ങുന്നു. കർണാടകയിൽ 16 വയസ്സിൽ താഴെയുള്ളവർക്കും ആന്ധ്രാപ്രദേശിൽ 13 വയസ്സിൽ താഴെയുള്ളവർക്കും സോഷ്യൽ മീഡിയ പ്ലാറ്റ്ഫോമുകൾ വിലക്കാനാണ് സർക്കാരുകളുടെ തീരുമാനം.
മാനസികാരോഗ്യ സംരക്ഷണം ലക്ഷ്യം കുട്ടികളിലെ അമിതമായ ഫോൺ ഉപയോഗം കുറയ്ക്കാനും, സൈബർ ആക്രമണങ്ങളിൽ നിന്നും മാനസിക സമ്മർദ്ദങ്ങളിൽ നിന്നും അവരെ സംരക്ഷിക്കാനുമാണ് ഈ പദ്ധതിയെന്ന് കർണാടക മുഖ്യമന്ത്രി സിദ്ധരാമയ്യ ബജറ്റ് പ്രസംഗത്തിൽ വ്യക്തമാക്കി. സോഷ്യൽ മീഡിയയുടെ അമിത ഉപയോഗം കുട്ടികളിൽ ഉറക്കമില്ലായ്മ, വിഷാദം, പഠനത്തിലുള്ള ശ്രദ്ധക്കുറവ് എന്നിവയ്ക്ക് കാരണമാകുന്നുണ്ടെന്ന് അദ്ദേഹം ചൂണ്ടിക്കാട്ടി.
90 ദിവസത്തിനുള്ളിൽ നടപ്പിലാക്കും ആന്ധ്രാപ്രദേശിൽ 13 വയസ്സിൽ താഴെയുള്ള കുട്ടികൾ സോഷ്യൽ മീഡിയ ഉപയോഗിക്കുന്നത് തടയാൻ 90 ദിവസത്തിനുള്ളിൽ പുതിയ കർമ്മപദ്ധതി കൊണ്ടുവരുമെന്ന് മുഖ്യമന്ത്രി ചന്ദ്രബാബു നായിഡു നിയമസഭയിൽ അറിയിച്ചു. കുട്ടികളുടെ സുരക്ഷ മുൻനിർത്തിയാണ് ഇത്തരമൊരു സുപ്രധാന തീരുമാനം കൈക്കൊള്ളുന്നതെന്ന് അദ്ദേഹം പറഞ്ഞു.
അതേസമയം, നിയമം പ്രായോഗികമായി എങ്ങനെ നടപ്പിലാക്കും എന്നതിലും കുട്ടികളുടെ പ്രായം ഡിജിറ്റലായി എങ്ങനെ പരിശോധിക്കും എന്നതിലും വരും ദിവസങ്ങളിൽ കൂടുതൽ വ്യക്തത വരുമെന്നാണ് പ്രതീക്ഷിക്കുന്നത്.